سياسة الخصوصية

١. بياناتك إنت (صاحب الحساب)

• الحساب: إيميلك واسمك وصورتك لو دخلت بحساب Google، ودولتك ومدينتك لو كتبتهم.
• رقم الواتساب (اختياري): لو كتبته، بنستخدمه نتواصل معاك بخصوص حسابك وعروض لبق وأخبارها. تقدر تمسحه من الإعدادات في أي وقت.
• ملف البيزنس: اسم النشاط، المنتجات والأسعار، العرض الحالي، اللوجو، وأي حاجة بتكتبها عن نشاطك. ده اللي لبق بتكتب منه.
• اللي بتعمله: البوستات والصور والفيديوهات والمقالات والإعلانات اللي بتعملها، وجدول النشر.
• الحسابات اللي بتربطها (فيسبوك، إنستجرام، واتساب، تيليجرام، حساب الإعلانات، إيميلك للحملات): بنحفظ مفاتيح الدخول بتاعتها مشفّرة. ده بيشمل التوكنات، وسر تطبيق Meta (App Secret) لو ربطت حساب إعلاني بتوكنك، وكلمة سر إيميلك لو ربطته. مشفّرة يعني متخزّنة بشكل محدش يقدر يقراه من غير مفتاح عندنا. بنستخدمها بس عشان ننشر ونرد ونجدد الربط (وتجديد الحساب الإعلاني بيتحاول تلقائياً قبل ما صلاحيته تخلص، ولو فيسبوك ماسمحش هيظهرلك تنبيه "اربط تاني")، ومابنعرضهاش ولا بنشاركها مع حد، وبتتمسح لما تفك الربط أو تحذف حسابك.
• الاستخدام: الأدوات اللي بتستخدمها، والرصيد اللي اتخصم (بوستات / ردود / فيديوهات)، وتكلفة الذكاء الاصطناعي لكل عملية. التكلفة بتتسجل كأرقام بس، مش نص كلامك.
• الدفع: بيانات الكارت مابتعديش علينا خالص، شركة الدفع Dodo Payments هي اللي بتتعامل معاها. إحنا بنحفظ المبلغ وحالته ورقم العملية. لو دفعت بإنستاباي أو تحويل، بنحفظ اسم المحوّل ورقم التحويل وصورة الإيصال اللي رفعتها.

٢. بيانات عملائك إنت (الناس اللي بتكلّم نشاطك)

لما تشغّل الرد الآلي أو البث أو المتابعة أو حملات الإيميل، لبق بتحفظ بيانات عن عملائك:

• رسايلهم وردودك عليهم على واتساب وماسنجر وإنستجرام وتيليجرام.
• أساميهم وأرقامهم أو حساباتهم زي ما المنصة بتبعتها.
• الإيميلات اللي بتستوردها أو بتضيفها، ومعاها إقرارك إنهم وافقوا يستلموا منك.
• التعليقات على بوستاتك، والناس اللي سابوا بياناتهم في إعلان أو رابط حملة.

مين المسؤول؟ إنت صاحب البيانات دي والمسؤول عنها، وإحنا بنشغّلها نيابة عنك وبس (في لغة القانون: إنت "المتحكّم" وإحنا "المعالج"). يعني إنت مسؤول إن عندك حق تكلّم الناس دي وإنهم وافقوا يستلموا منك. وإحنا مابنستخدم بيانات عملائك لأي حاجة غير خدمتك: مابنبيعها، ومابنكلمهم باسمنا، ومابنستخدمها في تدريب أي ذكاء اصطناعي. لو حد من عملائك طلب يتمسح، ابعتلنا ونمسحه (الطلب ده بيتنفّذ يدوي دلوقتي).

٣. الزوار اللي لسه ماسجلوش

• لو جرّبت المولّد في الصفحة الرئيسية، الكلام اللي كتبته بيروح للذكاء الاصطناعي عشان يتكتب البوست. ولو سبت إيميلك، بنحفظه عشان نبعتلك النتيجة.
• عشان نعرف أنهي إعلان أو رابط جابك، بنحط ملف صغير في المتصفح (كوكي اسمه lbq_src) بيفضل 90 يوم. بنعرف منه اسم المصدر بس، مش هويتك.

٤. بنستخدم البيانات في إيه، وبأي أساس

• نشغّل الخدمة اللي طلبتها: نكتب ونصمم وننشر ونرد ونبعت باسمك، ونحسب رصيدك ونخصم منه ونرجّعه لو العملية فشلت، ونبعتلك أكواد الدخول وتأكيد الدفع وتنبيهات الحساب. (الأساس: تنفيذ العقد بينا.)
• نحدد السعر وطريقة الدفع المناسبة لبلدك، ونحمي الخدمة من الاحتيال وإساءة الاستخدام، ونفهم إيه اللي شغّال وإيه اللي محتاج يتصلح من أعداد مجمّعة من غير أسامي. (الأساس: مصلحة مشروعة.)
• نبعتلك عروض لبق وأخبارها. تقدر توقفها من رابط "إلغاء الاشتراك" في أي إيميل، أو بمسح رقمك. (الأساس: موافقتك.)
• نحتفظ بسجلات الدفع زي ما القانون بيطلب. (الأساس: التزام قانوني.)

٥. مين بيوصله إيه (الشركات اللي بنشتغل معاها)

كل شركة بتاخد بس اللي محتاجاه عشان تعمل شغلتها:

• Anthropic (Claude): بتكتب النصوص والردود الآلية والمقالات والتحليلات. بيوصلها كلامك وملف البيزنس، ورسايل عملائك اللي محتاجة رد.
• Google (Gemini): بيعمل الصور والبوسترات وصوت الفيديو. بيوصله الوصف وصور منتجك لو رفعتها. وجوجل كمان لتسجيل الدخول لو اخترته.
• Replicate: بيشغّل موديلات من شركات تانية للفيديو (Kling) والخلفيات (Flux) وكتابة كلام الفيديو كترجمة (Whisper)، وصوت لبعض الفيديوهات (MiniMax) لما يتفعّل. بيوصله الوصف والصور أو الفيديو المطلوب يتعالج.
• Cloudinary: بيخزّن الصور والفيديوهات واللوجو وصور إيصالات التحويل.
• MongoDB Atlas: قاعدة البيانات اللي فيها حسابك وكل اللي فوق.
• Vercel: السيرفرات اللي الموقع شغّال عليها.
• سيرفر لبق على Hetzner: بيشغّل جلسة واتساب (QR) وتجهيز الفيديوهات.
• Meta (فيسبوك / إنستجرام / واتساب / الإعلانات): بننشر ونرد ونعمل الإعلانات على حساباتك إنت. Meta بتشوف المحتوى والرسايل زي أي حاجة على منصتها.
• Telegram: لو ربطت بوت تيليجرام.
• Dodo Payments: الدفع بالكارت. بيوصله بيانات كارتك مباشرة من غيرنا.
• Brevo: بيبعت إيميلات لبق (أكواد الدخول وتأكيدات الدفع وتنبيهات الحساب والتقارير الأسبوعية وأخبار لبق، ونتيجة المولّد للزوار اللي طلبوها في الصفحة الرئيسية). حملات الإيميل لعملائك بتطلع من إيميلك إنت اللي ربطته.
• ipapi.co: المتصفح بيسأله عن دولتك من عنوان الإنترنت بتاعك (IP)، عشان يختار اللغة واللهجة الأول.
• Facebook SDK: سكريبت فيسبوك بيتحمّل في صفحة الحسابات المربوطة، وفيسبوك ممكن يحط كوكيز بتاعته ساعتها.

بعض الشركات دي سيرفراتها برّه بلدك، يعني بياناتك ممكن تتخزن أو تتعالج في دول تانية. بنختار شركات معروفة، وكل واحدة بتاخد الحد الأدنى اللازم لدورها. إحنا مابنبيعش بياناتك ولا بيانات عملائك لحد، ومابنستخدمهاش في إعلانات لحد تاني.

٦. الكوكيز (ملفات صغيرة في المتصفح)

• كوكي تسجيل الدخول: عشان تفضل داخل.
• كوكي اللغة: عشان نفتكر عربي ولا إنجليزي (سنة).
• كوكي المصدر lbq_src: أنهي إعلان أو رابط جابك (90 يوم).
• كوكي أمان مؤقت وقت ربط فيسبوك.
• حاجات بتتحفظ على جهازك بس: تفضيلاتك، وكود الخصم لو جيت برابط فيه كود، وآخر تجربة للمولّد.
• مابنستخدمش Google Analytics ولا Facebook Pixel.

٧. بنحتفظ بالبيانات قد إيه

• طول ما حسابك موجود، بياناتك موجودة.
• رسايل عملائك: مخطط نبدأ قريباً نمسح نصوص الرسايل اللي عدّى عليها أكتر من 12 شهر. الخطوة دي لسه مااتطبقتش، وهنحدّث الصفحة لما تتطبق.
• إشعارات لبق الداخلية بتتمسح لوحدها بعد 180 يوم.
• سجلات الدفع (العمليات بالكارت، وتحويلات إنستاباي أو البنك مع صور الإيصالات، وسجل تعديلات الأدمن على الرصيد): بنحتفظ بيها 5 سنين من تاريخ الدفع، زي ما قواعد حفظ السجلات التجارية والضريبية في مصر بتطلب. بعدها بتتمسح صور الإيصالات ويتفصل السجل عن اسمك وإيميلك. دي سياستنا، والمسح التلقائي بعد المدة لسه مااتبرمجش.

٨. حذف الحساب

• من الإعدادات ← "حذف الحساب نهائياً". الحذف من قاعدة البيانات فوري، ومعاه: ملف البيزنس، المحتوى، رسايل عملائك وجهات الاتصال، الحملات والبث، الحسابات المربوطة ومفاتيحها، جلسة واتساب، والرصيد.
• لو عندك اشتراك شغّال، الحذف مش هيتم لحد ما يتلغي. كلّمنا على support@labiqtech.com ونلغيه.
• اللي بيفضل: سجلات الدفع وسجل تعديلات الأدمن على الرصيد، للمدة المكتوبة فوق (5 سنين)، عشان الحسابات والضرايب ومراجعة الاسترداد.
• لسه بنشتغل عليه (بصراحة): الصور والفيديوهات نفسها على Cloudinary لسه مابتتمسحش أوتوماتيك، ابعتلنا لو عايزها تتمسح دلوقتي. وإلغاء صلاحيات لبق عند فيسبوك وجوجل بتعمله إنت من إعدادات المنصة دي، وعند تيليجرام ابعت /revoke لـ @BotFather عشان يلغي توكن البوت، لأننا بنمسح مفاتيحها عندنا بس. وعلى واتساب QR: سجل الجلسة عندنا بيتمسح فوراً، لكن الربط المفتوح على موبايلك بيفضل لحد ما تشيله من "الأجهزة المرتبطة".

٩. حقوقك

أيًّا كانت دولتك، تقدر تطلب نسخة من بياناتك (بصيغة تقدر تنقلها)، تصحّحها، تمسحها، أو تعترض على استخدام معين. ابعت على support@labiqtech.com من إيميل حسابك، وهنرد خلال 30 يوم بالكتير. النسخة بتتجهز يدوي، مفيش زرار تحميل لسه.

لو إنت في الاتحاد الأوروبي أو بريطانيا، من حقك كمان تشتكي لهيئة حماية البيانات في بلدك. وده مابيشيلش أي حق إلزامي بيديهولك قانون بلدك.

١٠. الأمان

• الموقع كله بيشتغل بـ HTTPS، يعني الاتصال متشفّر.
• مفاتيح حساباتك المربوطة وكلمة سر إيميلك متخزّنة مشفّرة.
• الوصول للبيانات من جوه لبق محدود.
• مفيش نظام 100% آمن. لو اتأكد إن فيه تسريب بيمس بياناتك، هنبلّغك من غير تأخير وخلال 72 ساعة من التأكد.

١١. السن

الخدمة لأصحاب الأنشطة اللي سنهم 18 سنة أو أكتر، ومابنجمعش بيانات عن قصد من أي حد أصغر. لو اكتشفنا ده، بنحذف الحساب.

١٢. التعديلات

لو غيّرنا حاجة مهمة، هنبلّغك على الإيميل قبلها بـ 14 يوم، وهنحدّث تاريخ "آخر تحديث" فوق.

١٣. التواصل

لأي سؤال عن خصوصيتك أو بياناتك: support@labiqtech.com، أو من زرار واتساب الدعم في الموقع.